A tenenta de alcaldesa explicou que o programa do Talentia Summit, tanto no que tén que ver co foro inaugural como no relativo á feira de emprego e formación, “foi deseñado atendedo aos obxectivos que nos marcamos desde a concellaría no que tén que ver co fomento do emprego entre a mocidade, as mulleres e a poboación migrante, e sobre todo coa aposta por un emprego digno e de calidade”. María Rozas salientou, sobre todo, “a aposta polo talento xuvenil e polas ferramentas que nos axuden a retelo e exprimilo, atendo a sectores e mercados que son atractivos para a mocidade”.

A primeira tenenta de alcaldesa e concelleira de Dereitos e Servizos Sociais, Promoción Económica e Xuventude, María Rozas, abriu o Foro Talentia lembrando "o enorme potencial que tén Santiago no ámbito da innovación tecnolóxica, grazas a unha USC que ofrece ata 11 titulacións do ámbito das ciencias, a tecnoloxía, a enxeñería e as matemáticas, incluído un novo grao en Intelixencia Artificial; e que debe establecer sinerxias cun tecido produtivo vinculado ao sector tecnolóxico que dá emprego en Compostela a preto de 2.000 persoas".

Feira virtual

Nesta edición, o Talentia Summit mantén a feira virtual de emprego do 13 ao 17 de novembro, coa participación de preto de 80 empresas que ofrecerán uns 300 postos de traballo vacantes, pero tamén formación ou certificacións profesionais. As persoas interesadas poderán visitar os seus stands virtuais, programar entrevistas e interactuar cos seus departamentos de selección de persoal.

O Talentia Summit´23 centrarase no futuro do traballo e o rol determinante da intelixencia artificial e doutras tecnoloxías emerxentes, nun formato híbrido que facilitará que as persoas participantes se beneficien das vantaxes das modalidades presencial e dixital. O evento será unha gran plataforma para o desenvolvemento profesional, grazas ás 15.000 prazas gratuitas en conferencias, obradoiros e cursos de formación online e presenciais.

Esta semana abriuse o prazo de inscrición para todas as actividades de Talentia Summit. A maior feira do talento e o emprego do Estado presenta unha oferta formativa meirande que nas anteriores edicións e con múltiples candidaturas para vacantes de emprego. A procedencia das solicitudes é maioritariamente de Galicia, como indicou o técnico de Emprego, Xavier Ferreiro (Santiago, 2113; A Coruña, 1448; Vigo, 1297), pero tamén "de Madrid, 2041, ou de Barcelona, 308".