A cerdeira brava (Prunus avium) é unha especie caducifolia que adoita atoparse en Galicia como árbore acompañante en carballeiras, fragas e bosques de ribeira. A súa presenza habitual é en forma illada ou en pequenas mouteiras, preferentemente en zonas frescas e sombrías. É unha árbore produtora de madeira nobre e cun crecemento medio. Para o seu uso en plantacións forestais, recoméndase empregar clons con calidade demostrada, preferentemente de orixe autóctona, de xeito que estean adaptados ó solo e ó clima.