Santiago logra o seu máximo histórico de pernoctacións en xullo con máis de 180.000

Data de escritura

Os establecementos hoteleiros de Santiago xa superan as pernoctacións acumuladas nos sete primeiros meses do ano 2019 confirmando a forte reactivación turística da cidade

Máximo histórico pernoctacións mes de xullo Festas do Apóstol

Os establecementos hoteleiros de Santiago sumaron no pasado mes de xullo o seu máximo histórico de pernoctacións neste mes con 181.156 pernoctacións, cun cremento do 12,73% respecto de xullo do 2019, segundo os datos do INE.

No acumulado do ano, de xaneiro a xullo, Santiago suma xa 789.695 pernoctacións, situándose xa por riba das 786.577 recollidas neste mesmo periodo do 2019, ano no que se conseguíu o record anual de pernoctacións na cidade.

Os datos de pernoctacións de xullo recollidos polo INE, sumados aos datos de evolución do aeroporto de Santiago – Rosalía de Castro recollidos por AENA, que destacaban un crecemento mensual do 20% respecto a xullo 2019, máis os datos de Compostelas entregadas pola Oficina de Acollida ao Peregrino, confirman a forte reactivación turística da cidade ao longo do ano, situando a demanda turística da cidade xa por riba dos datos pre-Covid.

Segundo os datos do INE, a recuperación da demanda turística de Santiago está sendo máis rápida que a media española, tal e como está sucedendo tamén no aeroporto. Así, neste mes de xullo, fronte ao crecemento do 12,7% de Santiago respecto do 2019, a media española aínda se situou por baixo dos datos pre-Covid, cun descenso do 2,1%.

O crecemento nas pernoctacións en Compostela apoiouse tanto na consolidación dos datos do turismo español como na constante e progresiva recuperación do turismo internacional, posible en boa medida grazas á ampliación de rutas e frecuencias con múltiples destinos europeros dende o aeroporto de Santiago.

O turismo español sumou 110.921 pernoctacións en xullo, practicamente un 20% máis que no 2019, superando tamén os datos do Ano Santo 2010, cando se alcanzaran as 94.157 estadías. Pola súa banda, o turismo internacional chegou ata as 70.235 pernoctacións, un 3,72% máis que no 2019.

Dende Turismo de Santiago considérase que estes datos oficiais confirman a forte reactivación turística da cidade pese ao complexo contexto global actual, avalando o traballo que se ten feito dende a entidade de xestión turística municipal nos últimos anos.