Un vistazo ás macrocifras do crecemento turístico
España, un dos destinos líderes do mundo, vese beneficiada pola tendencia global de crecemento turístico. Pero hai un matiz importante. E é que mentres a competencia no norte de África e Mediterráneo oriental estivo atenuada ou desaparecida, España gozou dun ciclo de sete anos de vacas gordas. Cabe lembrar que no ano 2010 España recibía 53 millóns de viaxeiros mentres que o 2017 pechouse con case 82 millóns. Un 55% máis.
O problema é que un crecemento artificial da demanda deste tipo pode crear burbullas de investimento que engaden máis e máis oferta aos destinos, baixo a falsa presunción de que a festa non vai parar. Algúns profesionais lembran que os nosos destinos maduran e non poden estar a crecer indefinidamente, senón que deben comezar a investir en mellorar a xestión ou renovar a oferta engadindo valor ás propostas.