O primeiro dos estudos realizado para Turismo de Santiago, como líder do proxecto BODAH, tiña como fin, salientou Flavia Ramil, "medir e entender mellor o comportamento tanto dos visitantes como dos residentes das cidades patrimoniais do Espazo Atlántico para facilitar a súa xestión e lograr un turismo sostible".

O ámbito do estudo se circunscribe ao casco histórico, que recibe a maior parte do turismo da capital galega. Dentro do ámbito da zona monumental, identificáronse como "puntos críticos" determinados espazos urbanos, que en Santiago foron os seguintes: Praza do Obradoiro, Praza da Quintana, Praza de Galicia, Porta do Camiño e Praza da Algalia de Abaixo.

Así, grazas a este informe respóstase a cinco cuestións fundamentais: que lugares son os máis visitados, cantas persoas reciben, como afecta ese tránsito ao lugar en cuestión, que percepción ten o turista e o residente e que efectos sociais e económicos xeran na cidade.

Marcouse o cálculo por metro cadrado nos puntos críticos de seguimento en 0.92 m2/persoa. O conteo fíxose a través da toma de fotografías en intervalos de 15 minutos, e distribuídas por mostraxe en diferentes días da semana e horarios. As tomas de información programáronse en dous momentos distintos de afluencia turística, que permitise unha comparación temporal: entre o 16 e o 22 de agosto de 2021 e entre o 18 e o 24 de outubro do mesmo ano. Realizáronse un total de 120 medicións ad hoc dos tránsitos de persoas nos puntos críticos acordados e, salientou a Xerente de Turismo, "en ningunha das medicións realizadas se superou o valor crítico establecido de 0,92 m2/persoa". Así, a medición máis elevada foi a rexistrada na Praza da Quintana, o 20 de agosto ás 12 horas, con valores máximos de 5,49 m2.de espazo para cada persoa. Nese momento, contabilizáronse 455 persoas nese punto.

Vídeo

Na rolda de prensa tamén se presentou o vídeo realizado para dar a coñecer a nosa cidade e no que a propia Xerente de Turismo de Santiago fai un percorrido polos puntos máis senlleiros da capital galega mentres explica os obxectivos principais do BODAH.

Próximos pasos

Unha vez que o sistema está definido e xa se estableceron as catro cidades nas que se está a intervenir, o consorcio que conforma o proxecto BODAH, no que xunto a Turismo de Santiago participan Fomento de San Sebastián, a Fundación Santa María la Real del Patrimonio Histórico, a Universidade Nova de Lisboa, Cork Institute of Technology, Glasgow Caledonian University e Bangor University, seguirá a traballar no desenvolvemento de solucións tecnolóxicas que faciliten unha mellor xestión do turismo e os fluxos de persoas en cidades patrimoniais do Espazo Atlántico.

O proxecto BODAH, liderado por Turismo de Santiago, desenvólvese dentro do programa Interreg Atlantic Area, cun orzamento total de 1.573.373 euros, dos que un 75% apórtaos o Fondo Europeo de Desenvolvemento Rexional (FEDER). Ademáis, está prevista a aprobación dunha ampliación de fondos.