Etiquetar os alimentos indicando a súa orixe impulsa as economías locais e o desenvolvemento sustentable
As etiquetas que indican a orixe xeográfica dos alimentos poden aumentar ata un 50 % o seu prezo final, segundo un informe difundido pola FAO. O estudo, elaborado xunto co Banco Europeo para a Reconstrución e o Desenvolvemento (BERD), establece que os alimentos rexistrados cunha etiqueta de indicación xeográfica están valorados en máis de 50.000 millóns de dólares (41.066 millóns de euros) ao ano en todo o mundo.
En concreto foron analizados nove casos, entre eles o café de Colombia, o queixo manchego de España, o viño brasileiro Vale dos Vinhedos, o azafrán de Marrocos, o té Darjeeling da India e o pemento Penja camerunés. A FAO destacou nun comunicado que, na maioría deses produtos, ese tipo de etiqueta incrementou o prezo final, cun valor engadido de entre un 20 e un 50 %, debido a que os consumidores están dispostos a pagar máis por alimentos asociados a características únicas de sabor, cor ou calidade.