Compostela premia aos establecementos comerciais polo miúdo máis senlleiros en cadansúa categoría. Todos os comercios poderán ser candidatos e optar a unha ou máis das categorías premiadas. As candidaturas poderán presentalas os propios comercios, as asociacións de comerciantes e, no caso das categorías "Comercio Agarimo" e "Comercio de Barrio", calquera persoa física.

Establécense seis categorías de premios:

• Comercio 2.0
• Comercio Agarimo
• Comercio Innovación
• Comercio de Barrio
• Comercio Emprega
• Comercio Veterano

O premio consistirá nunha peza de artesanía conmemorativa e mais unha insignia para o exterior do comercio que indique o premio obtido.

Para a creación da peza de artesanía conmemorativa, convócase un concurso entre os aretesáns que rematará o vindeiro 26 de marzo.

A entrega de premios terá lugar o día 19 de abril no Pazo de Raxoi.

Todos os formularios, tanto os de candidatura aos premios como os de participación no concurso de artesáns, están dispoñibles na web.