Para dar cumprimento a este obxectivo o Servizo de Apoio á Empresa lanza este “Plan Activa en Seguro" dirixido a autónomos, profesionais liberais e microempresas do sector servizos e da industria con sede fiscal, social e cando menos de un centro de actividade en Santiago de Compostela para a realización dos seus Plans Activa en Seguro personalizados nos que se inclúan as posibles medidas a tomar durante o confinamento, unha vez superada esta fase e a seis meses vista para o mantemento do negocio.

Cada unha das 15 empresas participantes realizará acompañada polo consultor responsable do programa o seu “Plan Activa en Seguro” no que se abordarán cando menos os seguintes aspectos

1. Análise do impacto do estado da alarma na prestación dos servizos ofrecidos pola empresa. Restricións de operación e alternativas.

Por suposto o impacto desta crise vai a afectar de xeito diferente ás empresas ou profesionais dependendo do sector no que operen e, sobre todo, da actividade que desenvolvan especialmente se as súas actuacións supoñen a agrupación de persoas.

1. Análise económica do impacto, axudas dispoñibles e marcos de refinanciamento.

Neste sentido, a análise económica e un correcto financiamento a curto prazo resulta fundamental para afrontar a incertidume, os cambios estratéxicos a realizar no negocio e sobre todo para non tomar decisións precipitadas nun momento no que a tensión é máxima.

1. A prestación do servizo con seguridade.

Moitas empresas non van a ter a capacidade de prestar os seus servizos do mesmo xeito que o facían con anterioridade, incluso aínda que o realizaran cunha alta rendibilidade e isto pode afectar de xeito grave ao seu negocio, polo que terán que reinventarse.

1. Procesos comerciais en tempo de confinamento. Posicionamento actual e posibilidades de cambio.

O xeito de comercializar os produtos ou servizos pode dun ou doutro xeito ter que mudar ou non, pero non debemos esquecer que estas situación complexas ás veces poden ser tamén momentos de novas oportunidades que calquera empresa ou profesional debe explorar.

1. Plan de activación a corto prazo.

Para poder actuar a medio e longo prazo é preciso primeiro actuar a curto prazo. Primeiro salvar os escollos que existen no momento actual e asegurar un correcto financiamento da empresa que non provoque rupturas, e levar tódalas medidas propostas á práctica, e despois deseñar e implantar a estratexia global.

1. Plan estratéxico a medio e longo prazo para o negocio.

Unha vez que a situación a curto prazo está salvada, o foco debe pórse en realizar os cambios que son precisos para un correcto desenvolvemento futuro da actividade, e isto se realiza tras estudar a situación inicial, avaliar os cambios a realizar e os investimentos, no seu caso, e deseñar unha nova folla de ruta estratéxica para levar á actividade á situación desexada.

Para a realización das consultorías telemáticas poderase empregar a vía telefónica ou calquera plataforma de videochamada previamente acordada entre a empresa prestataria do servizo e as empresas derivadas á mesma polo persoal técnico do Servizo de Apoio á empresa.

O número de horas de consultoría previsto por cada Plan Activa en Seguro é de 10 horas. As empresas participantes poderán realizar o seu plan empregando menos horas de consultoría das inicialmente previstas. Nese caso o Servizo de Apoio á Empresa poderá habilitar o acceso ao Plan de empresas que inicialmente non foran admitidas no mesmo por falta de prazas.

O servizo de consultoría será prestado por Fernando Piñeiro, consultor de empresas e administración pública con máis de 20 anos de experiencia no ámbito da promoción e desenvolvemento de novas empresas no ámbito do sector público e privado en xestión empresarial, axudas públicas, financiamento, planificación estratéxica e asesoramento a emprendedores/as, como acredita o seu perfil curricular dispoñible para a súa consulta nesta web.