O vindeiro luns 22 de outubro terá lugar o seminario sobre "Novidades en materia de mobilidade de persoas traballadoras e empresas, España-Portugal", organizado pola Confederación de Empresarios de Galicia, en Santiago de Compostela.

Recentemente aprobouse unha normativa que modifica a Directiva sobre o desprazamento de persoas traballadoras efectuado no marco dunha prestación de servizos, ao mesmo tempo que se está traballando sobre unha modificación da normativa en materia de coordinación dos sistemas de Seguridade Social que afectará á mobilidade.

Por iso, contaremos coa participación de profesionais con destacada experiencia no ámbito da mobilidade transnacional e en particular da mobilidade entre España e Portugal, que abordarán as obrigacións das persoas empresarias en materia de seguridade social e laboral á hora de desenvolver a súa actividade alén da fronteira.

A participación é gratuíta, en virtude do financiamento que a Comisión Europea e a Confederación de Empresarios de Galicia como socio da rede EURES Transfronteirizo Norte Portugal-Galicia, comprometen para o seu desenvolvemento.